Մոռանալ, որ ՀՀ կապույտ անձնագիր ունեցող արցախցին գրչի մեկ ստորագրությամբ դարձավ ճամփորդական անձնագիր ունեցող փախստական` սերունդների դատին է մնալու
ՆերքաղաքականԱյսօր կառավարության նիստում Նիկոլ Փաշինյանը հայտարարել էր, որ ԼՂ-ից բռնի տեղահանված որոշ շրջանակ կամա թե ակամա, անում են գործողություններ և քայլեր, որոնք սպառնալիք են ստեղծում Հայաստանի ազգային անվտանգության համար, հայտարարում են ինչ-որ վտարանդի կառավարությունների մասին: Սա պատասխանն էր Արցախի նախագահ Սամվել Շահամանյանը Le Figaro-ին տված հարցազրույցի, որտեղ վերջինս պատասխանելով հարցին, թե գոյություն ունե՞ն արդյոք վտարանդի պետություն և կառավարություն, մասնավորապես, ասել է. «Այո, այն շենքում, որտեղ ես հյուրընկալում եմ ձեզ Երևանում, գտնվում են Արցախի նախագահի գրասենյակը և դատական ու օրենսդիր կառույցների գրասենյակները: Խորհրդարանականները կարող են հավաքվել այստեղ՝ քվեարկելու համար։ Հոկտեմբերին ստորագրել եմ հրամանագիր, որով սահմանվում է, որ կառավարության բոլոր նախարարները մնում են իրենց պաշտոններում՝ կամավոր հիմունքներով»։
Կա արդյո՞ք ՀՀ-ում Արցախի վտարանդի կառավություն, թե՞ ոչ հարցի պատասխանը փորձել ենք ստանալ ԱՀ անկախ պատգամավոր Կարեն Հովհաննիսյանից, ով նկատեց.
-Արդյոք կա վտարանդի կառավարություն թե ոչ, իր հայտնի հարցազրույցում նշել է նախագահ Շահրամանյանը, ի հավելումն նշեմ, որ ոչ ոք երկրորդ կարծիք չունի այն մասին, որ Հայաստանի Հանրապետությունը ունի մեկ կառավարություն և այդ կառավարությունը կազմվել է համաձայն ՀՀ սահմանադրության՝ ուղիղ ընտրությունների արդյունքում։ Խնդիրը կայանում է նրանում , որ միջազգային ատյաններում մեզ համար տեսանելի քայլերով Հայաստանը գնում է արցախյան հարցի լիակատար սառեցմանը, մեկնաբանելով, որ արցախյան հիմնախնդիրը արհեստածին խնդիր է, որը գործողության մեջ է դրվել մեկ գերտերության կողմից, որպեսզի կառավարելի դարձնի Անդրկովկասում ընթացող գործընթացները ի օգուտ իրեն։ Մի բան հստակ է, որ կայսրությունները շարժվում են իրենց շահերով ու այս կոնտեքստում մոռացության մատնել Ադրբեջանի կողմից տեղի ունեցած ցեղասպան գործողությունները արցախահայության հանդեպ այդքան էլ «գովեստի» արժանանալու արարք չէ։ Մի գուցե խնդրի լուծման բանաձևի փնտրտուքի էներգիա այժմ Հայաստանը չունի, բայց մոռանալ, որ ՀՀ կապույտ անձնագիր ունեցող արցախցին գրչի մեկ ստորագրությամբ դարձավ ճամփորդական կապույտ անձնագիր ունեցող փախստական, դա սերունդների դատին է մնալու։
Առհասարակ ժամանակը իր գնահատականը կտա, իսկ ես ուզում էի նշել մի հարց, ՀՀ ում գործող ԱՄՆ- ի , ՌԴ -ի, Գերմանիյաի և այլ դեսպանատների պատերից ներս ՀՀ կառավարությունը լիազորություններ ունի՞, իսկ արդյո՞ք այդ դեսպանատների պատերից ներս գործո՞ւմ է ՀՀ օրենսդրությունը։ Ու եթե այդ պետությունները ասենք մի օր հայտնվեն այն վիճակում ինչ մենք, դա կխանգարի՞ Հայաստանին։ Հասկանալի է, որ բավականին բարդ օրեր ենք ապրում, բայց դա կարելի է ավելի հեշտ հաղթահարել, երբ բոլորս նույն մեխին խփենք, իսկ դրա համար անձնական, փոխադարձ հակակրանքները շպրտել մի կողմ, շաաաատ հեռու ու ուս ուսի աշխատել։ Բոլորս էլ հասկանում ենք, որ այս մոլորակում մենք մեծ հաշվով մենակ ենք և մեր ուժերի գերլարումով պիտի ապահովենք արևի տակ մեր բաժին տեղը։